दापोली : गुढीपाडव्यानिमित्त दापोलीतील निवेदिता प्रतिष्ठानतर्फे पर्यावरणपूरक (इको-फ्रेंडली) गुढीची निर्मिती करण्यात आली आहे. गुढी उभारण्यासाठी दर वर्षी बांबूची मोठ्या प्रमाणावर तोड केली जाते. हे प्रमाण कमी व्हावे यासाठी या वर्षी पर्यावरणपूरक गुढीचा लक्षवेधी प्रकल्प ‘निवेदिता’मार्फत हाती घेण्यात आला आहे.
ही गुढी तयार करताना वेटलेस्ट प्लास्टिक कचरा आणि वेस्ट बिल्डिंग मटेरियलचा प्रामुख्याने वापर करण्यात आला आहे. यातील प्लास्टिक कचऱ्याचा पुनर्वापर करण्यात आला आहे. या गुढीसोबत पाट, ओले अष्टगंध, लोटी, शेला, अशा सर्व पूजा साहित्याने सज्ज असलेला बॉक्स संस्थेने ‘ना नफा ना तोटा’ तत्त्वावर पाचशे रुपयांत उपलब्ध केला आहे. आपली वसुंधरा प्लास्टिक कचरामुक्त बनावी या उद्देशाने ही संकल्पना प्रत्यक्षात उतरविल्याची माहिती संस्थेकडून देण्यात आली.
गुढीसाठी संपर्क क्रमांक : ९८२०४ २८२१२, ९५६११ ४२०७८.